ပညာရေးအသုံးစရိတ်နှင့် ၀န်ကြီးဌာနတွင်း တစ္ဆေ ၂ ကောင် ပြဿနာ

Category: အယ်ဒီတာ့အာဘော်
Published on Wednesday, 15 May 2013 03:29
Written by အယ်ဒီတာ

editorial logoပိုမို ကျယ်လောင်စွာ ဆွေးနွေး ပြောဆိုနေကြပြီဖြစ်သည့် ပညာရေးကဏ္ဍ ပြောင်းလဲမှု တွင် အစိုးရဘက်ကလည်း အားကျမခံ ပညာရေး အသုံးစရိတ်ကို တိုးမြှင့်ခြင်းနှင့် အရည်အသွေးအတွက် စိုးရိမ်မကင်း ဖြစ်မှုများကို ဆွေးနွေးခြင်းတို့ လုပ်ဆောင်လျက် ရှိသည်။ ပြောင်းလဲ လုပ်ဆောင်မှုများအတွက် ကြိုဆိုရမည် ဖြစ်သော်ငြားလည်း အမှန်တကယ် ထိရောက်အောင်မြင်နို်င်သော ပညာရေး စီမံချက် ဖြစ်ပါသလားဆိုသည့် မေးခွန်းကိုမူ အများပြည်သူများက စိတ်ဝင်စားလျက်ရှိကြောင်း ပညာရေးဝန်ကြီးဌာန သတိပြုသင့်ပါသည်။ အထူးသဖြင့် ခေတ်ပညာတတ် ဖြစ်ကြသော ကျောင်းဆရာ ဆရာမများနှင့် မိဘပြည်သူများက ၀န်ကြီးဌာန၏ ပြောင်းလဲမှု ခြေလှမ်းတိုင်းအား စောင့်ကြည့်နေသည်ကို မမေ့ထားသင့်ပါ။ မီဒီယာခေတ်ဖြစ်သည့် အားလျော်စွာ ယခင်ကာလများမှာကဲ့သို့ တစ်ဦးတစ်ယောက်၏ ဆုံးဖြတ်ချက်အရဖြစ်စေ၊ တိုးတိုး တိတ်တိတ် လုပ်ဆောင်ခြင်းကိုဖြစ်စေ လက်ခံနိုင်ကြမည် မဟုတ်ပါ။ ပညာရေးတွင် သာ၍ ပွင့်လင်း မြင်သာမှုများ ရှိသင့်သည်ဟု မောက္ခပညာရေးမဂ္ဂဇင်းက ယုံကြည်ပါသည်။

၂၀၁၂-၂၀၁၃ ဘဏ္ဍာရေးနှစ်တွင် ပညာရေးအသုံးစရိတ်အတွက် ၄ ဒသမ ၁၃ ရာခိုင်နှုန်းဖြင့် ကျပ်သန်းပေါင်း ခြောက်သိန်းကျော် သုံးစွဲခွင့် ရရှိခဲ့ပြီး ယခုလာမည့် ပညာသင်နှစ် ၂၀၁၃- ၂၀၁၄ ဘဏ္ဍာနှစ်အတွက် ကျပ်သန်းပေါင်း ၅ ဒသမ ၈၄ ရာခိုင်နှုန်း (ကျပ်သန်းပေါင်း ကိုးသိန်းကျော်) ကို သုံးစွဲခွင့် ရရှိမည်ဖြစ်ကြောင်း သိရပါသည်။ ဤသည်မှာ ပညာရေးအသုံးစရိတ် ၁ ရာခိုင်နှုန်းကျော် တိုးမြှင့်လာခြင်း ဖြစ်သော်ငြားလည်း တိုင်းပြည်၏ ပညာရေး နာတာရှည် အကျပ်အတည်းဖြစ်နေသည့် အရည်အသွေး ပြဿနာနှင့် အရေအတွက် ပြဿနာ ၂ ရပ်စလုံးကို မည်မျှအတိုင်းအတာအထိ ဖြေရှင်းပေးနိုင်ပါမည်နည်း။

မြန်မာ့ပညာရေး သမားကြီးများ၏ သုံးသပ်ဝေဖန်မှုများကို လျစ်လျူမရှုသင့်ပါ။ ၀မ်းသာစရာ သတင်း ဖြစ်သော်ငြားလည်း ပညာရေး အရည်အသွေး တိုးတက်မှုအတွက် လုံလောက်သော ရင်းနှီးမြှပ်နှံမှု မဟုတ်ကြောင်းကို ရန်ကုန်ပညာရေးတက္ကသိုလ် အငြိမ်းစား ဒုတိယ ပါမောက္ခချုပ် ဦးမျိုးတင့်က သုံးသပ်ပါသည်။

၇ ရက်သတင်းဌာနနှင့် တွေ့ဆုံရာတွင် တက္ကသိုလ်တစ်ခု၏ စီမံ၊ ဘဏ္ဍာဌာန အရာရှိတစ်ဦးကလည်း ယခု တိုးမြှင့်ထားသည့် ပညာရေး ဘတ်ဂျက်ကြောင့် ပြောင်းလဲမှု ကြီးကြီးမားမားကို မျှော်လင့်၍ မရနိုင်ကြောင်း ထောက်ပြခဲ့သည်။

မောက္ခပညာရေး အင်တာဗျူးတစ်ခုတွင် အခြေခံပညာဦးစီးဌာန၏ ညွှန်ကြားရေးမှူးတာဝန်ယူခဲ့သူ အငြိမ်းစား ဆရာကြီးနိုင်ငွေသိမ်း (ယခု မွန်ဒီမိုကရေစီပါတီ ဥက္ကဌ) က ပညာရေးကဏ္ဍ တိုးတက် ပြောင်းလဲစေလိုပါလျှင် ဘတ်ဂျက်ကို GDP ၏ ၂၀ ရာခိုင်နှုန်းအထိ တိုးမြှင့် ရမည်ဖြစ်ကြောင်း ဆွေးနွေးထားပါသည်။ အနည်းဆုံး ၃ သန်းခန့်မျှသော မြန်မာကလေးငယ်များမှာ စာသင်ခန်းအပြင်ဖက်တွင် ရှိနေဆဲ ဖြစ်ကြောင်း ပညာရေး ၀န်ကြီးဌာနသတိချပ်သင့်သည် (ယူနီဆက်၊ ၂၀၀၆။ ကျောင်းအပ်နှံမှု ၂၀၁၁)။

မည်သူတို့၏ ပညာရေးဝန်ကြီးဌာန ဖြစ်ပါသနည်းဟူ၍ မေးခွန်းထုတ်ကြခြင်းကို အပြစ်ဟူ၍လည်း မရှုမြင်သင့်ပါ။ အသုံးစရိတ် ၁ ရာခိုင်နှုန်း တိုးမြှင့်သည့်အတွက် ကလေးအရေအတွက် ၁ ရာခိုင်နှုန်း၊ ပညာရေး အရည်အသွေးဖြစ်သည့် ဆရာ့စွမ်းဆောင်ရည်နှင့် သင်ရိုးညွန်းတမ်း ခေတ်မီမှုတို့ ၁ ရာခိုင်နှုန်းခန့်မျှ တိုးမြင့်လာဖွယ်ရာ ရှိနိုင်ပါသည်။ လိုအပ်နေသော ပညာရေး အပြောင်းအလဲသို့ ဦးတည်နိုင်ပါမည်လား။

ဘယ်သောအခါမျှ အရှုံးမပေါ်သည့် ရင်းနှီးမြှုပ်နှံမှုမှာ ပညာရေးတွင် ရင်းနှီးမြှုပ်နှံမှုဖြစ်ကြောင်း၊ ရေတို၊ ရေရှည် အကျိုးအမြတ် အများဆုံး ကဏ္ဍဖြစ်ကြောင်းနှင့် လူထု၏ ဘ၀ အရည်အသွေး တိုးတက်ရေးအတွက်ပါ လုပ်ဆောင်ချက်ဖြစ်ကြောင်းတို့ကို ပညာရေးဝန်ကြီးဌာနသည် သင်ခန်းစာ နံပါတ် ၁ အနေဖြင့် လေ့လာထား သင့်ပါကြောင်း အကြံပြုတင်ပြလိုသည်။ ၀န်ကြီးဌာနကို အစဉ်အမြဲ ခြောက်လှန့်နေသော ပညာရေးတစ္ဆေ နှစ်ကောင်ဖြစ်သည့် အရည်အသွေးနှင့် အရေအတွက်တို့ကြောင့် အကုသိုလ်တရားများလည်း  ထပ်မံ၍ မတိုးပွားစေသင့်ပါ။

မြန်မာကျောင်းဆရာဆရာမ အများစုကြီး သီဆိုဟစ်ကြွေးနေသော ကွယ်လွန်သူ အနုပညာရှင် အဉ္ဇလီမောင်မောင်၏ “ပြောင်းလဲခြင်းနဲ့ လိုက်ရွှေ့ရမယ်… ပုံသေဆိုရင် နောက်ကျသွားပြီတဲ့” သီချင်းစာသားကို ၂၁ ရာစု မြန်မာ့ပညာရေး ဆောင်ပုဒ်အနေဖြင့် ၀န်ကြီးဌာနသည် တစ်ရက်လျှင် သုံးကြိမ်ခန့် ရွတ်ဖတ်သရဇ္ဈယ် သင့်ပါသည်။ ပညာရေးဝန်ကြီးဌာန၏ အခမ်းအနားတိုင်း အပိတ်တွင်လည်း ဤကဲ့သို့ ကြွေးကြော်သံ ၃ ကြိမ်ကို ရွတ်ဆိုကြပါစို့။ “ဦးနှောက်အသစ်နဲ့ မျိုးဆက်တဆင့်မှာ …. ပုံသဏ္ဌာန်တွေဟာ ပြောင်းလဲခဲ့ပြီတဲ့…”။   

ပညာရေး ၀န်ကြီးဌာနသည် အိုင်ကျူရော၊ အီးကျူပါ မနိမ့်သင့်တော့ပါ။

နာမည်ကောင်းရလိုမှုများ၊ ပါတီ၏ မဲအရေအတွက် တိုးမြှင့်လိုမှုများ၊ ၀န်ကြီးဌာန၏ အွန်ပေပါ ရီပို့ကောင်း ထွက်လာရေးတို့်အတွက်သာ လူထု တရပ်လုံးနှင့် တိုက်ရိုက်သက်ဆိုင်နေသည့် ပညာရေးပြဿနာတို့ကို အသုံးမချသင့်ပါ။ လက်တွေ့ကျသည့် ပြောင်းလဲမှုများကို လိုအပ်ချက် များအရ၊ ဆရာဆရာမများနှင့် ကလေး သူငယ်တို့၏ တောင်းဆိုနေသော အသံများ၊ မျှော်လင့်ချက်များ၊ ခံစားချက်များကို ထည့်သွင်းစဉ်းစား လုပ်ဆောင်သင့်ပါသည်။ ၀န်ကြီးဌာနသည့် သင်ခန်းစာနံပါတ် ၁ ကို ကျေညက်စွာ နားလည် သဘောပေါက်ပြီးလျှင် လက်တွေ့ကျသော (ယခုထက် အဆပေါင်းများစွာ) ပညာရေးစရိတ် တိုးမြှင့်မှုကို လုပ်ဆောင်သင့်ပါကြောင်း တိုက်တွန်းအပ်ပါသည်။

မောက္ခပညာရေးမဂ္ဂဇင်း

၁၅ မေလ၊ ၂၀၁၃

Powered by Bullraider.com