တစ်နိုင်ငံလုံးအဆင့်ငါးရရှိခဲ့သော မောင်မြင့်ထွန်းနှင့် တွေ့ဆုံမေးမြန်းခြင်း

http://harmonia.csd.net/~skyline/wp-content/uploads/1.interview.jpg

ယခုနှစ် တက္ကသိုလ်ဝင်တန်းစာမေးပွဲတွင် ကချင်ပြည်နယ်၊ အထက၊ မြို့လှ (ရွှေကူ) မြို့နယ်မှ ခုံအ မှတ် ကက-၁၈၆၆၊ ဝိဇ္ဇာဘာသာတွဲတွင် အမှတ်ပေါင်း ၄၉၀ ဖြင့် တစ်နိုင်ငံလုံးအဆင့်ငါးရရှိခဲ့သော မောင်မြင့်ထွန်းနှင့် တွေ့ဆုံမေးမြန်းခြင်း

မေး။    ။ ညီလေး အခုလိုတစ်နိုင်ငံလုံးမှာ ဝိဇ္ဇာဘာသာတွဲကို အဆင့်ငါးရရှိခဲ့အောင် ဘယ်လိုကြိုးစား ခဲ့ရတယ်ဆိုတာ ပြောပြပေးပါ။

ဖြေ။    ။ ကျွန်တော့်အနေနဲ့ တစ်နေ့စာကျက်ချိန်ကို နံနက် ၆ နာရီလောက်ကနေ ၁၁ နာရီလောက်ကို ကျက်တာရှိတယ်။ နံနက် ၄ နာရီကနေ ၇ နာရီခွဲလောက်အထိကို ကျက်တာရှိတယ်။ တစ်ဘာသာကို အနည်းဆုံး ၄၅ မိနစ်လောက်ကျက်တယ်။ အဲဒီလိုပုံမှန်ကြိုးစားခဲ့ရတာပါ။

မေး။    ။ ညီလေးအနေနဲ့ ကျူရှင်တက်တာမျိုးတွေရှိလား၊ ဒါမှမဟုတ် ဘော်ဒါနေတာမျိုးတွေရှိလား။

ဖြေ။    ။ ကျွန်တော်တို့ဆီမှာ ကျူရှင်ဆိုတာမရှိပါဘူး။ ရှိလဲမတတ်နိုင်ပါဘူး။ ကျွန်တော့်အနေနဲ့ ကျောင်းကိုပဲ အဓိကအားကိုးပြီးတက်ခဲ့ရတာပါ။ ကျူရှင်မတက်ခဲ့တာက အိမ်ကလဲ ထားမပေးနိုင်ဘူး။ ကျွန်တော်တို့က အဆင်လဲမပြေဘူး။ ကျွန်တော်နေတဲ့နေရာနဲ့ အခုတက်ခဲ့တဲ့ကျောင်းက မိုင်နှစ်ရာ၊ သုံးရာဝန်းကျင်လောက်ဝေးတယ်။ ကားတစ်ဆင့်၊ ရထားတစ်ဆင့်၊ သင်္ဘောတစ်ဆင့်စီးမှကျောင်းကို ရောက်တယ်။ အိမ်ကလဲအဆင်မပြေတော့ ကျွန်တော်ကျောင်းနဲ့နီးတဲ့မြို့မှာပဲသွားပြီး ကျောင်းတက်ခဲ့ ရတာပါ။

မေး။    ။ ညီလေးအနေနဲ့ အခက်အခဲတွေကြားကနေ အခုလိုဂုဏ်ထူးတွေရပြီးအောင်ခဲ့တာဆိုတော့ ဘယ်တက္ကသိုလ်တက်ဖို့ စဉ်းစားထားလဲ။

ဖြေ။    ။ စဉ်းစားနေတုန်းပါ။ အိမ်ကလဲ သိပ်အဆင်မပြေတော့ တက္ကသိုလ်ဆက်တက်ဖို့က ဘယ်လို လာဦးမလဲမသိဘူး။ ကျွန်တော်က ဘီအီးဒီတော့ ဆက်တက်ချင်တယ်။ ဘီအီးဒီတက်ပြီး ကျွန်တော်က ဝေးလံတဲ့ဒေသက ကလေးတွေရဲ့ ပညာရေးကိုပြန်ပြီး ဖြည့်ဆည်းပေးချင်တယ်။

မေး။    ။ ညီလေး ဝိဇ္ဇာဘာသာတွဲကို ရွေးချယ်ဖြစ်ပုံကို ပြောပြပေးပါဦး။

ဖြေ။    ။ ကျွန်တော်က တခြားဘာသာတွဲတွေယူမယ်ဆိုရင် ဘီအီးဒီဝင်ခွင့် မရလောက်ဘူးထင်လို့။ ဝိဇ္ဇာဘာသာတွဲယူပြီး ကြိုးစားခဲ့တာပါ။ သူများတွေလို ကျူရှင်လဲမနေနိုင်တော့ ဒီဘာသာတွဲက ကျွန် တော့်အတွက်အဆင်ပြေမယ်ထင်လို့ပါ။

မေး။    ။ နောင် ၁၀ တန်းဖြေမယ့် ကျောင်းသားတွေကို ညီလေးအနေနဲ့ဘာပြောချင်လဲ။

ဖြေ။    ။ နောက်ဖြေမယ့် ၁၀ တန်းကျောင်းသားတွေအနေနဲ့ စာကိုကြိုးစားကြပါ။ ကျွန်တော့်ထက်သာ အောင်ကြိုးစားကြပါ။ စာကိုပုံမှန်ကြိုးစားကြပါ။ တစ်နိုင်ငံလုံးက ကျောင်းသားတွေကိုပြောတာပါ။ ဘာ ဖြစ်လို့ဒီလိုပြောရတာလဲဆိုရင် ကျွန်တော့်အိမ်ကအဆင်မပြေဘူး။ ကျူရှင်လဲမထားပေးနိုင်ခဲ့ဘူး။ ကျောင်းတောင်သက်သာရာ နည်းလမ်းတွေနဲ့ တက်ခဲ့ရတယ်။ တက္ကသိုလ်ဆက်တက်ဖို့လဲမသေချာ သေးဘူး။ ကျွန်တော်သူများတွေထက် အားငယ်ခဲ့ရတယ်။ ချို့ချို့တဲ့တဲ့ ပညာသင်ခဲ့ရတယ်။ ဒါကြောင့် ကျွန်တော့်ထက်တော်တဲ့ ကျောင်းသားတွေထွက်ပေါ်စေချင်တဲ့ဆန္ဒကြောင့်ပါ။

Democracy Today Daily

ဇွန်လ (၁၅) ရက်၊ ၂၀၁၅ ခုနှစ်

Powered by Bullraider.com