လိင်ပညာရေး (Sex Education)

http://flaglerlive.com/wp-content/uploads/sex-abstinence-no.jpg

ကျောင်းတွေမှာ လိင်ပညာရေးသင်ကြားရန်လိုသလား

လိင် (Sex) လို့ပြောလိုက်ရင် ထိတ်စရာ ကြောက်စရာ လန့်စရာဖြစ်သွားလောက်အောင် စိုးမိုး ခြောက်လှန့်ခြင်း ခံထားရရင် ဒီကိစ္စကြီးဟာ ထူဆန်းတဲ့ကိစ္စကြီး ဖြစ်နေမှာပဲ။ လိင်ကိစ္စဆိုတာ လူတိုင်းနဲ့ ပတ်သက်နေတယ်။ ရှောင်လွှဲလို့မရတဲ့ကိစ္စပဲ။

လိင်ကိစ္စဆိုတာ စူးစမ်းစရာကိစ္စမှန်ပါတယ်။ ဒါပေမဲ့ ကျန်းမာရေးအသိနဲ့ လေ့လာနိုင်တာ ပိုပြီးတော့ သဘာဝကျ တယ်။ ဘဝတစ်လျှောက်လုံး မွေးဖွားသည်က သေဆုံးသည်အထိ ကျန်းမာရေးအသွင်နဲ့ ထိန်းသိမ်း စောင့်ရှောက်သင့်ကြောင်း သင်ကြားဖို့သင့်ပါတယ်။

မိဘတွေနဲ့ အုပ်ထိမ်းသူတွေဟာ လိင်ပညာရေးပေးတဲ့သူတွေထဲမှာ အခြေခံကျတဲ့ ကလေးတွေနဲ့ အနီးစပ်ဆုံး သူတွေ ဖြစ်ပါတယ်။ ဒါကြောင့် ကိုယ့်တာဝန်ကို ကိုယ်က ဦးစွာယူပြီး သင်ကြားပြသ ညွှန်ကြားမှုကောင်းတွေ လုပ်ဆောင်ပေးရမယ်။ ကလေးတွေဟာ အိမ်တွေမှာ ကျောင်းတွေထက် လိင်ကိစ္စတွေမှာ ပိုပြီးတော့ လေ့လာ စရာတွေရှိပါတယ်။ မိဘနဲ့ အုပ်ထိန်းသူတွေက ဆင်ခြင်စရာရှိတာကို ဆင်ခြင်၊ သင်စရာရှိတာတွေကို ကြိုတင်ပြီး သင်လိုက်ကြရင် ကျောင်းရောက်တော့ ပညာပေးရတာ အဆင်ပြေစေနိုင်ပါတယ်။

လိင်ကိစ္စဆိုတာ ညစ်ညမ်းတယ်၊ မပြောအပ်၊ မကြည့်အပ်၊ မသိအပ်လို့ ယူဆကြတာ များတယ်။ ဟုတ်ပါတယ် ဒါပေမဲ့ ခေတ်သစ်မှာ ဒီကိစ္စတွေဟာ ကလေးတွေကို ပိတ်ပင်တားဆီးထားလို့ ရနိုင်တဲ့ ကိစ္စတွေ မဟုတ်ဘူး ဆိုတာလည်း သဘောပေါက်ထားရမယ်။ ဒါကြောင့် အဆိုးဘက်ကိုတွေးပြီး အဆိုးဘက်ရောက်သွားနိုင်တာ ထက်၊ အကောင်းမြင်ပေးပြီး အကောင်းဘက်ကို ဆွဲခေါ်နိုင်မယ်ဆိုရင် ပိုကောင်းပါတယ်။

မြန်မာ့လူ့ဘောင်အဖွဲ့အစည်းဟာ အရှက်အကြောက်ကြီးတယ်ဆိုပြီး ဖိနှိပ်ထားတတ်ကြတာများပါတယ်။ ဗြိတိန် ပညာရေးမှာတော့ လိင်ပညာရေးကို စနစ်တကျ မသင်လိုက်ရင် အမျိုးသမီးတွေဟာ မြုံတဲ့အနေအထားတွေကို ရောက်သွားတတ်တယ်ဆိုပြီး စည်းရုံးလှုံ့ဆော်မှုတွေ လုပ်နေကြတယ်။ ဆိုလိုတာက လိင်ကိစ္စတွေကို စနစ်တကျ မသင်ရင် လိင်ပိုင်းဆိုင်ရာ ကူးစက်တတ်တဲ့ ရောဂါတွေ ဖြစ်ပွားမှုနှုန်းပိုများနိုင်တယ်။ မသိခြင်းဟာ “ပေါက်ကွဲလုဗုံးတစ်လုံး” လို့ တင်စားထားပါတယ်။ အရွယ်ရောက်လာတဲ့ ကလေးတိုင်းဟာ ဗုံးတစ်လုံးစီကို ပိုင်ဆိုင်ထားကြတယ်။ ဘယ်လိုထိန်းသိမ်းထားရမှန်းမသိရင် အချိန်မတိုင်မီပေါက်ကွဲပြီး ပျက်စီးသွားနိုင်တယ်။

ကျောင်းတွေမှာ လိင်ပညာရေးကို ကျယ်ပြန့်စွာ သင်ကြားသင့်ပါတယ်။ သင်ကြားတယ်ဆိုတဲ့နေရာမှာလည်း ရှက်စရာကို ရယ်စရာလို ပြောနိုင်တဲ့ဆရာ၊ ညစ်ပတ်တယ်လို့ ထင်နေတာကို ကျန်းမာရေးအတွက် ဆင်ခြင်စရာ တွေအနေနဲ့ သင်ကြားပေးနိုင်တဲ့ ဆရာတွေရှိဖို့လိုပါတယ်။

လိင်ပညာရေးနဲ့ လိင်ပညာပေးဆိုတာ လူငယ်တွေ အနာဂတ်အတွက် ရင်းနှီးမြှုပ်နှံသင့်တဲ့ လုပ်ငန်းတစ်ခုလို့ နိုင်ငံတော်အနေနဲ့ သတ်မှတ် လုပ်ဆောင်သင့်ပါတယ်။ ပြန်မရနိုင်တဲ့ ရင်းနှီးမြှုပ်တစ်ခုလို့ထင်ပြီး လွှတ်ပေးထား လိုက်ရင် အရွယ်မတိုင်မီ ပညာရေးလောကနဲ့ ဝေးပြီး အိမ်ထောင်သားမွေးဘဝတွေဖြစ်သွားရပါလိမ့်မယ်။ အဲဒီ အနေအထားဟာ နိုင်ငံတော်အတွက် ဆုံးရှုံးမှုပိုများစေနိုင်ပါတယ်။

ယောက်ျားတိုင်း မိန်းမတိုင်းဟာ ကိုယ်ပိုင်တဲ့ အသားနဲ့ အရေပြားတွေကို ထိန်းသိမ်းစောင့်ရှောက်ရမယ်ဆိုတာ ပညာပေးရမယ်။ ထိန်းသိမ်းစောင့်ရှောက်ဖို့ သတင်းအချက်အလက်တွေ ရယူပိုင်ခွင့်၊ သိရှိပိုင်ခွင့်၊ ဆုံးဖြတ် ပိုင်ခွင့်၊ ကျန်းမာသော အန္တရာယ်ကင်း ဆက်ဆံနည်းတွေကအစ စနစ်တကျသင်ကြားပေးနိုင်အောင် ကြိုးစား သင့်ပါတယ်။ ဒါဟာ နိုင်ငံ့အရေးကိစ္စတစ်ခုအနေနဲ့ပါ သတ်မှတ်လုပ်ဆောင်သင့်ပါတယ်။

Powered by Bullraider.com