ရင်ဆိုင်ကြည့်လိုက်ပါ

Category: သူ့အမြင်
Published on Wednesday, 05 August 2015 01:01
Written by တင်ညွန့်

http://essaymatik.com/wp-content/uploads/2014/11/ielts-writing-%C3%B6zel-ders.jpg

ကျွန်တော် တက္ကသိုလ်မတက်ခင်ကတည်းက စာရေးတယ်။ စာရူးတစ်ယောက်ဆိုပါတော့။ တက္ကသိုလ်တက် တော့လည်း စာတွေရေးပြီး မဂ္ဂဇင်းတိုက်တွေလိုက်ပို့တယ်။ တစ်ခါမှ ဖော်ပြခြင်း မခံရဘူး။ စိတ်ဓာတ်မကျဘူး။ ရေးထားတဲ့စာတွေ သေတ္တာတစ်လုံးအပြည့်။ နောက်ဆုံး ရန်ကုန်တက္ကသိုလ်နှစ်ပတ်လည် မဂ္ဂဇင်း (၁၉၇၇-၇၈) ကျမှ ကဗျာလေးတစ်ပုဒ်၊ ဘာသာပြန် ဝတ္ထုတိုလေးတစ်ပုဒ်ကို ဖော်ပြခြင်းခံရတယ်။ ကိုယ့်စာကို ပထမဆုံး ပုံနှိပ် စာလုံးနဲ့ မြင်ဖူးတာ ပီတိဖြစ်သပေါ့။

ကျောင်းပြီးတော့ ကျောင်းဆရာဝင်လုပ်တယ်။ စာတွေရေးတယ်။ တိုက်တွေပို့တယ်။ တစ်ခါမှ မပါဘူး။ တိုက် တစ်တိုက်မှာဆိုရင် သွားပို့ကတည်းက ဖတ်တောင်မကြည့်ဘဲ ပယ်ဆိုတဲ့ ခြင်းတောင်းထဲ ပစ်ထည့်လိုက်တာ ကြုံဖူးတယ်။ နောက်ပိုင်းမှာ အဲဒီတိုက်က ကျွန်တော့်ဆီက စာမူလာတောင်းတဲ့ အဖြစ်ရောက်ခဲ့တယ်။

ကျောင်းဆရာဘဝမှာ ဝါသနာနဲ့ ရသစာတွေရေးတယ်။ ဘာသာတွေပြန်တယ်။ မအောင်မြင်ဘူး။ ဘယ်မှာမှ မသုံးဘူး။ နောက်ပိုင်း အိုင်တီဆိုင်ရာ စာတွေရေးတော့ ကွန်ပျူတာဂျာနယ်ကသုံးတယ်။ ဒီလိုနဲ့ ကွန်ပျူတာ ဂျာနယ်မှာ ပင်တိုင် ဆောင်းပါးရှင်ဖြစ်လာတယ်။

အဲဒီအချိန်မှာ ဗြူတီမဂ္ဂဇင်းကလည်း လူငယ်ဆိုင်ရာစာပေတွေရေးပေးဖို့ ကမ်းလှမ်းတယ်။ အဲဒီလိုနဲ့ လစဉ်ရေး ပေးလိုက်တာ စာအုပ်တစ်အုပ်စာလောက်ဖြစ်တော့ Wisdom House ကစာအုပ်ထုတ်ဖို့ ကမ်းလှမ်းတယ်။ စာအုပ် တစ်အုပ်ဖြစ်သွားတယ်။ အဲဒီစာအုပ်က ထွန်းဖောင်ဒေးရှင်းကပေးတဲ့ လူငယ်စာပေဆုရတယ်။

Facebook ကို ၂၀၁၁ လောက်ကတည်းကသုံးတယ်။ ခုလို စာတွေ တက်ရေးလိုက်တာနဲ့ အဆဲခံရတော့ တာပဲ။ ဘယ်သူဆဲဆဲ ကိုယ်ရေးချင်တာတွေရေးတယ်။ ၂၀၁၅ အထိလည်း ရေးနေတာပဲ။ ခြိမ်းခြောက်တာလည်း ခံရတယ်။ ဒါပေမဲ့ ကိုယ်လုပ်ရမယ့်အလုပ် ဆက်လုပ်တယ်။ စိတ်ထဲမှာ တစ်ခုခုရေးလိုက်တိုင်း ဘယ်တော့မှ အကျိုးမဲ့ မဖြစ်ဘူးလို့ပဲ ခံယူထားပြီး ဆက်ရေးတယ်။

ဆိုလိုချင်တာက ကြွားပြောနေတာမဟုတ်ဘူး။ တကယ်ဖြစ်ချင် တကယ်လုပ်၊ စူးစူးစိုက်စိုက်လုပ်၊ စွဲစွဲမြဲမြဲလုပ်၊ စေတနာနဲ့လုပ်၊ အကျိုးတစ်ခုခုတော့ဖြစ်လာမှာပဲ။

ကျွန်တော် ကျောင်းဆရာဘဝက အနားယူလိုက်တော့ ဘာအလုပ်မှ မရှိဘူး။ ဒါပေမဲ့ စာပဲရေးစားတယ်။ ခုထိတော့ ထမင်းမငတ်ဘူး။ လူတန်းစေ့နေနိုင်သေးတယ်။ လူငယ်တွေ စိတ်ပျက်တယ်လို့ ပြောသံကြားရင် ကျွန်တော် စိတ်ဆိုးတယ်။ ရှေ့တစ်လှမ်းမတိုးကြည့်ဘဲ ဘယ်တော့မှ စိတ်ပျက်တယ်လို့ မပြောနဲ့။ ဘာမဆို ရင်ဆိုင်မယ်ဆိုတဲ့ စိတ်ကိုသာမွေးထား တဝက်လောက်အောင်မြင်နေပြီဆိုတာ သိထားစေချင်တယ်။

၂၀၀၅ ခုနှစ်လောက်က စာမရေးတတ်လို့ စိတ်ပျက်တယ်ဆိုတဲ့ လူငယ်တစ်ယောက်ကို လဖက်ရည်ဆိုင်ခေါ်၊ လက်ဖက်ရည်အတင်းတိုက်ပြီး သတင်းအတင်းရေးခိုင်းခဲ့တာ မှတ်မိသေးတယ်။ သူက ခုဆိုရင် နာမည်ကျော် မီဒီယာကြီး တစ်ခုမှာ အောင်မြင်တဲ့ အယ်ဒီတာကြီးဖြစ်နေပြီ။ ဒါကြောင့် မလုပ်ကြည့်ဘဲ၊ ဇွဲမရှိဘဲ၊ အလုပ်မှာ နှစ် မထားဘဲ မဖြစ်နိုင်ပါဘူးလို့ ဘယ်တော့မှ လာမပြောနဲ့။

၅.၈.၂၀၁၅

Powered by Bullraider.com