ကျောင်းကိစ္စပြင်ပသို့ မတိုင်ကြားရန် ကျောင်း သားမိဘများကို ၀န်ခံလက်မှတ်ထိုးခိုင်း

ရှမ်းပြည်နယ်အရှေ့ပိုင်း တာချီလိတ်မြို့ရှိ အခြေခံပညာ အထက်တန်းကျောင်း အထက (၁) မှ ကျောင်းအာဏာ ပိုင်များက ကျောင်းတွင်းဆောင်ရွက်နေသည့် ကိစ္စများကို ပြင်ပသို့ မတိုင်ကြားရန်အတွက်  ကျောင်းသားမိဘ များကို ၀န်ခံကတိပြုလက်မှတ် ရေးထိုးခိုင်း ခဲ့သည်။

ကျောင်းအုပ်ဆရာကြီး အပါအ၀င် ၎င်း၏စာရေးမနှင့် ဆရာဆရာမအချို့တို့က ကျောင်းသူ၊ ကျောင်းသားများထံ ငွေကြေးကောက်ခံနေသည့်အပေါ် ကျောင်းသားမိဘများက မကျေနပ်၍ အင်တာနက်အွန်လိုင်းပေါ်တွင် ရေးတင် ထားသည့်အတွက်ကြောင့် ယခုလိုလက်မှတ် ထိုးခိုင်းခြင်းဖြစ်သည်ဟု သိရကြောင်း ကျောင်းသားမိဘတစ်ဦးက ယခုလိုပြောသည်။

“အင်တာနက်မှာ သတင်းတွေထွက်လို့ သူတို့ဖက်က အဲလိုမျိုး ၀န်ခံလက်မှတ်ထိုးခိုင်း တယ်လို့လည်း ပြောသံကြားတယ်။”

လက်မှတ်ထိုးခဲ့စဉ်က ရေးသားထားချက်များနှင့် ပတ်သက်၍ “ကျောင်းသားတွေရဲ့ လူမှုရေး ပညာရေးနဲ့ ပတ်သက်ပြီးတော့ အတန်းပိုင်ဆရာဆရာမတွေနဲ့ ကျောင်းအုပ်ဆရာကြီး တွေက ပြုလုပ်တဲ့ကိစ္စ တွေ မှာတဲ့ ကျောင်းသားမိဘတွေက မည်သည့်ကိစ္စကိုမဆို တစ်ခုခု အမှားရှိတယ်ဆိုရင်တဲ့ သူတို့နဲ့ပဲ လာ ရောက်ပြီးတော့ ဖြေရှင်းပေးဖို့ပဲပေ့ါ။ ဘယ်ဌာနကိုမှ မတိုင်ပါဘူးဆိုတဲ့ လက်မှတ်ကို ထိုးခိုင်းတာ။” ဟု ဆက်ပြောသည်။

ယခုလ ၈ ရက်နေ့က ဟစ်တိုင်အင်တာနက် စာမျက်နှာတွင် တာချီလိတ်မြို့ အထက(၁)မှ ကျောင်းသူ၊ ကျောင်း သားများထံ ငွေကြေးကောက်ခံမှုနှင့်ပတ်သက်ပြီး ကျောင်းသားမိဘ တစ်ဦးမှ အိတ်ဖွင့်ပေးစာတစ်စောင် ရေးသား ခဲ့သည်။

လွန်ခဲ့သည့် လေးရက်ခန့်က လက်မှတ်ထိုးခိုင်းခဲ့ခြင်းဖြစ်ပြီး မိဘအချို့မှာ မည်သည့် အတွက်ကြောင့် ယခုလို လက်မှတ်ထိုးရသည်ကို မသိကြသော်လည်း အချို့မိဘများ အနေနှင့် မတရားသည့်လုပ်ရပ်ဖြစ်သည့်အတွက် မ ကျေနပ်ကြဟု ဆက်ပြောသည်။

“လက်မှတ်ကိုထိုးပေးလိုက်တော့လည်း မိဘအနေနဲ့က မတိုင်ပါဘူးဆိုတဲ့ ကတိပေးလိုက် သလိုမျိုးပဲ။ ထိုးမပေးပြန်ဘူးဆိုလို့ရှိရင်လည်း ဒီကျောင်းအုပ်ဆရာကြီးနဲ့ ဆရာဆရာမ တွေရဲ့ လုပ်တဲ့အလုပ်ကို ဆန့်ကျင်ဖက်ပြုတယ်ဆိုပြီးတော့ ရှေ့ဆက် ဘာဖြစ်လာမယ် ဆိုတာကိုလည်း ပြောလို့မရဘူး။ အဲဒီ တော့ မထိုးပေးလည်းအခက်၊ ထိုးပေးလည်း အခက် အဲလိုမျိုးဖြစ်နေတာဗျ။”

အခြားကျောင်းသားမိဘတစ်ဦးက ကျောင်းသားရေးရာကိစ္စနှင့် ပတ်သက်၍ မိဘများနှင့် ကျောင်းဆရာ၊ ဆရာမ များ ညှိနိုင်းဖြေရှင်းမှုမျိုး တစ်ကြိမ်မျှ မကြုံခဲ့ဘူးကြောင်း ယခုလို ပြောသည်။

“ဘယ်သူကဆွေးနွေးမှာလည်းဗျာ။ဆွေးနွေးလည်းသူတို့ကဖျက်သိမ်းပေးတာမျိုးမှမရှိတာကိုး။ ကောက် တာကောက်တယ် စာရင်းဇယားတွေ အသေးစိတ်ကိုလည်း ကျောင်းသားမိဘတွေ အစည်းအဝေးမှာ ဘာမှ ရှင်းပြထားတာမျိုးမှ မရှိဘူး။”

မြန်မာ စစ်အစိုးရက သတင်းလွတ်လပ်ခွင့်  လုံးဝမပေးဘဲ ထိန်းချုပ်ထားသည့်အပြင် ယခုကဲ့သို့ ကျောင်းအာဏာ ပိုင်များကပါ ကန့်သတ်လာမှုအပေါ် မြန်မာ့သတင်း သမဂ္ဂအတွင်းရေးမှူး ဦးစံမိုးဝေက ယခုလို သုံးသပ် ပြောဆို သည်။

“အခုက တဖြည်းဖြည်းနဲ့ ပိုပိုပြီးတော့ ထင်ရှားလာတာက သူတို့ လုပ်ရပ်တွေက မမှန်ဘူး။ မမှန်တော့ အရပ်သားတွေရဲ့ ပွင့်ပွင့်လင်းလင်းထုတ်ဖော်ပြီးတော့အမှန်ကိုပြောတာပေ့ါဗျာ။ အဲဒီဟာကို နိုင်ငံ တကာ မီဒီယာတွေကနေပြီးတော့ ရသွားပြီးလို့ရှိရင် ပြန်ပြောပြမှာကို သူတို့ အရမ်းစိုးရိမ်တယ်ဗျာ။ အဲ ဒီတော့ အမှောင်ချတဲ့အထဲကနေပြီးတော့ နောက်ဆုံးပိတ် သူတို့အနေနဲ့ ဘယ်လိုမှ တခြားနည်းတွေနဲ့ ပြောလို့၊ စည်းရုံးလို့ မရတော့ပဲနဲ့ အစိုးရိမ် လွန်ပြီးတော့ မိဘတွေကို ခေါ်ပြီးတော့ ဒါမျိုးလက်မှတ်ထိုး ခိုင်းတယ်လို့ပဲ ကျနော် ထင်ပါတယ်။”

ပြင်သစ်အခြေစိုက် နယ်စည်းမခြားသတင်းအဖွဲ့၏ ၂၀၁၀ ခုနှစ်ထုတ်ပြန်သည့် အစီရင်ခံစာ၌ မြန်မာနိုင်ငံသည် သတင်းလွတ်လပ်ခွင့် အဆိုးဝါးဆုံးနိုင်ငံ(၁၀)နိုင်ငံအနက် တနိုင်ငံ ပါဝင်ကြောင်းဖော်ပြထားသည်။

Powered by Bullraider.com