မြစ်ကြီးနားတက္ကသိုလ်ကျောင်းအုပ်က ၎င်း၏ စာရေးမအား နားရွက်ဆွဲ ပါးရိုက်ခဲ့

ကချင်ပြည်နယ် မြစ်ကြီးနားတက္ကသိုလ် ကျောင်းအုပ် ဆရာမကြီးသည် ၎င်း၏ စာရေးမတစ်ဦးအား နားရွက်ဆွဲ ပါးရိုက်ခြင်း ပြုလုပ်ခဲ့ကြောင်း သိရသည်။ သြဂုတ် ၉ရက်နေ့တွင် ကျောင်းအုပ်ဆရာမကြီး ဒေါက်တာဒေါ်ခင်သီတာက ထိုစာရေးမအား အတန်းဝင် ရမည့်ဆရာတစ်ဦးကို အခေါ်လွှတ်ရာ ချက်ချင်းသွားမခေါ်သဖြင့် ယခုလို ဒဏ်ပေးလိုက်ခြင်း ဖြစ်သည်။

မြစ်ကြီးနားတက္ကသိုလ်၊ ကချင်ပြည်နယ်။ ဓါတ်ပုံ - ကချင်သတင်းဌာန

“နားဆွဲပြီး ပါးရိုက်ပေးလိုက်တယ်၊ နားနည်းနည်း၊ နားကပ်ပန်ထားလို့ဖြစ်မယ် သွေးထွက်လို့ ဆေးရုံသွားလိုက်ရတယ်” လို့ တက္ကသိုလ်စာရေးတစ်ဦးပြောသည်။
ကျောင်းအုပ်ဆရာမကြီး၏ နာကျင်အောင်ပြုကျင့်မှုအပေါ် ထိုစာရေးမသည် မကျေနပ်တာကလွဲပြီး ရုံးတိုင်ကြားခြင်းမရှိခဲ့ပါ။ “လူကြီးပြောရင် ချက်ချင်းလုပ်တတ်ပါ” ဟု စိတ်ဆိုးဆိုးဖြင့် ဆရာမကြီးက ရိုက်ခံရသူအား ပြောကြောင်း စာရေးမမှ ဆက်ပြောသည်။
သြဂုတ် ၁၂ရက်နေ့ မြောက်ပိုင်းတိုင်းစစ်ဌာနချုပ် (မပခ) တိုင်းမှုး ဗိုလ်ချုပ်စိုးဝင်း လာရောက်ကြည့်ရှုစစ်ဆေး မည်ဖြစ်သည်။
ထို့ကြောင့် သြဂုတ် ၉ ရက် တနင်္လာနေ့မစတင်ကာ အတန်းတိုင်း ဆရာ/မလစ်လပ်မှုမရှိဝင်ပေးရန် ကျောင်းအုပ်ဆရာမကြီး ညွှန်ကြားထားရာ အတန်းချိန်ပျက်ကွက်နေသည့် ဆရာတစ်ဦးကို စာရေးမအား ခေါ်ခိုင်းချိန် ယခုကိစ္စ ဖြစ်ခဲ့သည်။
ယခုလို ကျောင်းအုပ်ဆရာမကြီး၏ ရိုင်းစိုင်းသည့်အပြုအမူပေါ် ကျောင်းသားများနှင့်စာရေးများသာမက ပတ်ဝန်းကျင်ဒေသခံများပါ မကျေမနပ်ဖြစ်နေကြသည်။
“ဆရာမကြီးက သိပ်စွာတယ်၊ ဇီဇာကြောင်တယ်၊ အဲလိုတော့ မလုပ်သင့်ဘူးထင်တယ်၊ ပြဿနာကဖြစ်နေကြ၊ သတင်းက အပြင်ကိုမထွက်ဘူး” ဟု ကျောင်းသားတစ်ဦးက မကျေမနပ်ပြောသည်။
ယခုကိစ္စမတိုင်ခင်ကလည်း ဗိုက်ခွဲပြီးကလေးမွေးခါစ အခြားစာရေးမတစ်ယောက်ကို ဆရာမကြီးက ကိုယ်ချင်းမစာဘဲ တက္ကသိုလ်ကျောင်းအပေါ်ထပ်သို့ စာအုပ်များ သယ်ခိုင်းခဲ့ရာ ဗိုက်ခွဲထားသည့်ဒဏ်ရာ နာကျင်ခဲ့ရသဖြင့် ထိုစာရေးမ ဆေးရုံပြန်တက်လိုက်ရသည်။
အသက်(၄၀)ကျော်ရှိ ဒေါက်တာဒေါ်ခင်တီတာသည် မြစ်ကြီးနားတက္ကသိုလ်သို့ ပြီးခဲ့သည့် ၂၀၀၉ မှ ကျောင်းအုပ်ကြီးအဖြစ် ပြောင်းရွှေ့လာခဲ့ပါသည်။ ဆရာမကြီးသည် ဂျပန်နိုင်ငံမှ ရုက္ခဗေဒ Ph.D ရရှိသူဖြစ်သည်။
ယခုလို စာရေးမ နှစ်ဦးကဲ့သို့ အခြားတက္ကသိုလ်ဝန်ထမ်းများပါ ကျောင်းအုပ်ဆရာမကြီး၏ စိတ်ပိုင်း ရုပ်ပိုင်း နာကျင်စေသည်အထိ အစောကား ခံခဲ့ရသော်လည်း အာဏာပိုင်များကိုကြောက်ရွံ့မှုကြောင့် ယခုချိန်ထိ တစ်စုံတစ်ရာ တိုင်ကြားခြင်း မရှိကြောင်း သိရသည်။

Source : ကချင်သတင်းဌာန

Powered by Bullraider.com