ကျောင်းများတွင် ကွန်ပျူတာပရိုဂရမ်ရေးနည်းသင်ကြားရန် IBM ကုမ္ပဏီပူးပေါင်းမည်

http://i.telegraph.co.uk/multimedia/archive/02373/ict-lesson_Jane-Mi_2373448b.jpg

အမေရိကန်ပြည်ထောင်စုအပါအဝင် နိုင်ငံပေါင်း ၁၈၀ ရှိ၊ ကျောင်းသားကျောင်းသူပေါင်း သန်း ၁၀၀ ခန့်ကို ကွန်ပျူတာပရိုဂရမ် ကုတ်ရေးနည်းသင်တန်းများ သင်ကြားပေးရန် ကမ္ဘာကျော် ကွန်ပျူတာ ကုမ္ပဏီကြီးတစ်ခု ဖြစ်သည့် IBM သည် ပူးပေါင်းပါဝင်မည်ဖြစ်ကြောင်း USA Today သတင်းတွင်ဖော်ပြထားသည်။

၂၀၁၆ ခုနှစ် ဒီဇင်ဘာလ ၅ ရက်နေ့မှ ၁၁ ရက်နေ့အထိကို နှစ်စဉ် ကွန်ပျူတာသိပ္ပံပညာရေး လှုပ်ရှားမှု ရက်သတ္တပတ်အဖြစ်သတ်မှတ်ပြီး HOC (Hour of Code) သင်တန်းများကို ပေးသွားရန် စီစဉ်ထားကြောင်း ယင်းသတင်းကဆိုသည်။

၂၁ ရာစုသည် ပညာရေးတွင် နည်းပညာကို တတ်မြောက်ရန်ဆိုခြင်းထက် နည်းပညာကို ဖန်တီးတတ်စေရန် လေ့ကျင့်သင်ကြားပေးသင့်ကြောင်း၊ ကွန်ပျူတာ သိပ္ပံပညာရပ်သည် ကမ္ဘာကြီး၏ လုပ်ငန်းအရပ်ရပ်ကို ပြုပြင် ပြောင်းလဲပေးနိုင်မည့် တစ်ခုတည်းသော ပညာရပ်ဖြစ်သည်ကို သဘောပေါက်လာစေရန် သင်ကြားပေးရန် လိုအပ်လာကြောင်း IBM မှ တာဝန်ရှိသူများက ပြောကြားသည်။

ကွန်ပျူတာပညာရပ်အခြေခံများ တတ်မြောက်ထားသူသည် တီထွင်ဖန်တီးစိတ်နှင့် ပြဿနာများကို ဖြေရှင်း နိုင်စွမ်းများ အလိုအလျောက်တိုးတက်လာပြီးဖြစ်ကြောင်း၊ အနာဂတ် အလုပ်အကိုင် အခွင့်အလမ်းများအတွက် ကွန်ပျူတာပညာရေးတွင် ကုတ်ရေးနည်းသင်တန်းများကို ကျောင်းများကစပြီး သင်ကြားသင့်ကြောင်း USA Today တွင် ရေးသားထားသည်။

အမေရိကန်ပြည်ထောင်စု နိုင်ငံတစ်ဝှမ်းလုံးတွင် ကွန်ပျူတာနှင့် ပတ်သက်သည့် လုပ်ငန်းပေါင်း ငါးသိန်းကျော် ရှိကြောင်း၊ ကွန်ပျူတာနှင့် ဘွဲ့ရကျောင်းပြီးသူများမှာလည်း ဒုတိယလစာအများဆုံး ခံစားနေကြရသည့် စာရင်း တွင် ပါဝင်နေကြောင်း၊ အချိန်ပြည့်လုပ်သားများအဖြစ် ခန့်အပ်ခြင်း ခံရမှုတွင်လည်း ဘွဲ့ရပြီး ၆ လအတွင်း ၇၆ ရာခိုင်နှုန်းအထိ တိုးမြင့်လာခဲ့ကြောင်း ပညာရှင်များကထောက်ပြထားသည်။

ဒီဇင်ဘာ HOC ရက်သတ္တပတ်လှုပ်ရှားမှုအဖြစ် Scott အထက်တန်းကျောင်းတွင် ကွန်ပျူတာ ပရိုဂရမ်ရေးနည်း အထူးသင်တန်းများကို တတိယတန်းအဆင့်က စတင်သင်ကြားပေးခဲ့ပြီး၊ STEM ပညာရေးအကောင်အထည် ပေါ်လာစေရေးအတွက် ဝိုင်းဝန်းကြိုးပမ်းကာ၊ ကွန်ပျူတာကုတ်ရေးပြီး စက်ရုပ်များကို ခိုင်းစေနိုင်ရေး ဆရာများ ကလည်း ပူးပေါင်းဆောင်ရွက်လျက်ရှိကြောင်း USA Today သတင်းတွင် ဖော်ပြထားသည်။

Powered by Bullraider.com