လူငယ်အကြမ်းဖက်မှု ကာကွယ်ရေးလှုပ်ရှားမှု ရက်သတ္တပတ်

http://mnfccla.org/wp-content/uploads/2012/09/Progra4Stop-the-Violence.jpg

လူငယ်အကြမ်းဖက်မှုကာကွယ်ရေး ရက်သတ္တပတ်လှုပ်ရှားမှု (National Youth Violence Prevention Week) ကို အမေရိကန်ပြည်ထောင်စုတွင် နိုင်ငံတော်လှုပ်ရှားမှုအဆင့်ဖြင့် လှုပ်ရှားကြရန် ၂၀၁၇ ခုနှစ်အတွက် ဧပြီလ ၃ ရက်နေ့မှ ၇ ရက်နေ့အတွင်း ကျင်းပကြမည်ဖြစ်ကြောင်း USA Today သတင်းတွင် ထုတ်ပြန်ထားသည်။

SAVE (The National Association of Student Against Violence Everywheare) အစီအစဉ်ကို အကောင် အထည်ဖော်သည့် အနေဖြင့် National Youth Violence Prevention Week ကို လူထုလှုပ်ရှားမှုအသွင်ဖြင့် ဆောင်ရွက်ကြရန် ဆုံးဖြတ်ထားကြသည်။

ထိုလှုပ်ရှားမှုကို ဆောင်ရွက်ရခြင်းမှာ ပညာတတ် ကျောင်းသားများ၊ ဆရာများ၊ ကျောင်းအုပ်ချုပ်ရေး အာဏာ ပိုင်များ၊ တက္ကသိုလ်အဆင့် ဆရာ ဆရာမများ၊ ကျောင်းရုံးအဖွဲ့ ဝန်ထမ်းများအပြင် ပြည်သူများပါ လူငယ်များ ကြားထဲတွင် အကြမ်းဖက်တိုက်ခိုက်မှုများ ပပျောက်စေရန် ပညာပေးရေးဖြစ်သည်။

ကျောင်းများတွင် မိမိတို့ ကျောင်းပတ်ဝန်းကျင်သည် အေးချမ်းသာယာပြီး ငြိမ်းချမ်းသော ပညာရှာမှီးရန် နေရာ တစ်နေရာဖြစ်ကြောင်း လှုပ်ရှားမှုများကိုလည်း ထိုနေ့တွင် ပူးပေါင်းဆောင်ရွက်ကြရန် စီစဉ်ထားကြသည်။

SAVE လှုပ်ရှားမှုကို ၅ ရက်တိုင် ကျင်းပရာတွင်

-       Workshop များ ပူးပေါင်းကျင်းပပြီး အကြမ်းဖက်မှုဆန့်ကျင်ရေးကိစ္စများကို ကာကွယ်နိုင်ရေးအတွက် စုပေါင်းဆွေးနွေးရန်

-       ပိုစတာများ၊ ဆိုင်းဘုတ်များ၊ ကြော်ငြာစာတန်းများ စိုက်ထူပြီး မီဒီယာများကိုလည်း ပူးပေါင်း ပါဝင်လာ စေရန်

-       ဤလှုပ်ရှားမှု၏ အထိမ်းအမှတ်အရောင်များဖြစ်သည့် ခရမ်းရောင် ဖဲကြိုးများကို ကျောင်းရှိ ဘီရိုများ၊ ခြံစည်းရိုးများ၊ ဓာတ်တိုင်များ၊ သစ်ပင်များတွင် တပ်ဆင်ပေးရန် တို့ကို အဓိကထားကာ လုပ်ဆောင် ကြမည်ဖြစ်သည်။

အမေရိကန်ပြည်ထောင်စုတွင် လူငယ် ၆၀ ရာခိုင်နှုန်းခန့်သည် အကြမ်းဖက်မှု၊ ရာဇဝတ်မှု၊ မတရား အနိုင် ကျင့်မှုများကို ကျောင်းများတွင်သာမက အိမ်များတွင်ပါ ခံစားနေကြရသည်။ ထိုနေ့များတွင် ခရမ်းရောင် ဖဲကြိုးများကို ကျောင်းဝင်းနေရာအနှံ့ တပ်ဆင်ပြီး၊ လိမ္မော်ရောင် တီရှပ်များကို ကျောင်းသား ကျောင်းသူများက ဝတ်ဆင်ကာ SAVE အထိမ်းအမှတ်အဖြစ် လူငယ်များ အကြမ်းဖက်မှုမှ ကာကွယ်တားဆီးရေး လှုပ်ရှားမှုများကို ဆောင်ရွက်ကြမည်ဖြစ်ကြောင်း Nationalsave.org တွင် ထုတ်ပြန်ကြေညာထားသည်။

Powered by Bullraider.com