ဘာသာရေးယုံကြည်မှု ပြင်းထန်သည့်နိုင်ငံများတွင် သင်္ချာနှင့် သိပ္ပံညံ့ဖျင်းဟုဆို

https://cdn.theconversation.com/files/48846/width926/twf7z9hx-1400474579.jpg

သိပ္ပံပညာရှင်များ၏ လေ့လာဆန်းစစ်ချက်အရ ဘာသာရေးယုံကြည်ကိုးကွယ်မှုစိတ်ဓာတ် အလွန်ပြင်းထန်သည့် နိုင်ငံများမှ ကလေးများသည် ဘာသာတရားအပေါ် ယုံကြည်စိတ်နည်းသည့်နိုင်ငံများ၊ ဘုရားမဲ့ဝါဒကို လက်ခံ ထားသည့် နိုင်ငံများမှ ကလေးများထက် သင်္ချာနှင့် သိပ္ပံဘာသာရပ်များတွင်ထူးချွန်မှု အားနည်းကြောင်း Intelligence ဂျာနယ်သတင်းတွင် ဖော်ပြထားသည်။

ပညာရေးတွင်လည်း ဘာသာရေးဆိုင်ရာ အယူအဆများ လွန်ကဲစွာ လွှမ်းမိုးထားခြင်းမရှိသော နိုင်ငံများတွင် သင်္ချာနှင့် သိပ္ပံပညာရပ်များ၌ ထူးချွန်သူများစွာထွက်သည်ကိုတွေ့ရကြောင်း ယင်းသတင်းကဆိုသည်။

Missouri တက္ကသိုလ်နှင့် Leeds Beckett တက္ကသိုလ်များမှ စိတ်ပညာရှင်များ ပူးပေါင်းပြီး လေ့လာဆန်းစစ် ချက်အရ ဘာသာရေးအပေါ် ယုံကြည်ကိုးစားစိတ်များ လွန်ကဲစေရန် သင်ကြားခြင်းခံထားရပါက သင်္ချာနှင့် သိပ္ပံ ပညာရပ်များအပေါ်တွင် ယုံကြည်စိတ်များ လျှော့နည်းသွားပြီး ပညာရပ်များအပေါ် အဆိုးမြင်သဘောတရားများ လွှမ်းမိုးသွားစေနိုင်ကြောင်း ဆန်းစစ်ထားသည်။

ယင်းသုတေသနအဖွဲ့တွင် ဦးဆောင်ပါဝင်သူတစ်ဦးဖြစ်သည့် ဒေါက်တာ ဂစ္စဘတ် စတောက သင်္ချာနှင့် သိပ္ပံ ပညာရပ်များသည် ခေတ်သစ်လူ့ဘောင်အဖွဲ့အစည်းတွင် အဓိကကျသည့် ဘာသာရပ်များ ဖြစ်နေပြီး၊ ထိုဘာသာနှစ်ခုကို အားပေးချီးမြှောက်ရန်လိုကြောင်း ပြောကြားသည်။

ဘာသာရေးနှင့် အကန့်အသတ်လုပ်လိုက်ပြီး ပညာရပ်လေ့လာလိုက်စားမှုများကို အားမပေးဘဲ ကလေးများကို ဘာသာရေးတွင် အချိန်များစွာအကုန်ခံထားခြင်းကြောင့် ထင်မြင်ယူဆခြင်း၊ တွေးခေါ်မြော်မြင်ခြင်း၊ ဆန်းစစ် ဝေဖန်ခြင်းများ အားနည်းပြီး ဖန်တီးလုပ်ဆောင်လိုစိတ်များလည်း ကျဆင်းလာနိုင်ကြောင်း ဂစ္စဘတ်ကဆိုသည်။

ဒေါက်တာ စတောနှင့် ဒေါက်တာ ဒေးဗစ် ဂဲရာရီတို့ဦးဆောင်သည့် ပညာရှင်အဖွဲ့များသည် နိုင်ငံတကာ ပညာရည်စစ်ဆေးတိုင်းတာမှု အဖွဲ့များဖြစ်သည့် Programme for International Student Assessment (PISA) နှင့် Trends in International Mathematics and Science Study (TIMSS) တို့၏ ရလဒ် ဒေတာများအပေါ်တွင် အခြေခံပြီး အဖြေထုတ်ထားခြင်းဖြစ်ကြောင်း Intelligence တွင် ရေးသားထားသည်။

တိုင်းတာစစ်ဆေးချက်များအရ ဘာသာရေးတွင် အလွန်အကျွံ အယူသီးအစွဲအလမ်းကြီးခြင်း မရှိသော နိုင်ငံများ ဖြစ်သည့် ချက်သမ္မတနိုင်ငံ၊ ဂျပန်၊ အက်စ်တိုးနီးယား၊ ဆွီဒင်နှင့် နော်ဝေနိုင်ငံများမှ ကျောင်းသားများသည် သင်္ချာနှင့် သိပ္ပံပညာရပ်များတွင် ကမ္ဘာပေါ်၌ အထူးချွန်ဆုံးဖြစ်ကြောင်း ယင်းသတင်းကဆိုသည်။

Powered by Bullraider.com