ဘဏ်ဝန်ဆောင်မှုပေးနေသူ လူသားများနေရာတွင် စက်ရုပ်များကို သုံးနှစ်အတွင်း အစားထိုးမည်

http://i.investopedia.com/content/daily_blog/dont_live_here_or_r/shutterstock_213537307_bot.jpg

လူသားများကဲ့သို့ တွေးခေါ်ဆောင်ရွက်နိုင်စွမ်း၊ လုပ်ဆောင်နိုင်စွမ်းရှိသော ဉာဏ်ရည်တု AI (Artificial Intelligence) ကို အောင်မြင်စွာ ဖော်ထုတ် ခိုင်းစေလာနိုင်သည့် ခေတ်တွင် ဘဏ်လုပ်ငန်းဆိုင်ရာ ကိစ္စရပ်များ၌ ဝန်ဆောင်မှုလုပ်ငန်းများကို လာမည့် သုံးနှစ်အတွင်း လူသားများထက်၊ စက်ရုပ်များအား အစားထိုး အသုံးပြုလာဖွယ်ရှိကြောင်း Reuters သတင်းတွင် ဖော်ပြထားသည်။

Accentyre Banking Technology Vision 2017 အဖွဲ့က ပေးပို့ထားသည့် အစီရင်ခံစာတစ်ခုတွင် ဘဏ်လုပ် ငန်းပေါင်း ၆၀၀ ကျော်ကို လေ့လာဆန်းစစ်ပြီး၊ ပညာရှင်များနှင့် တွေ့ဆုံမေးမြန်း အကဲဖြတ်ချက်များအရ ဘဏ်လုပ်ငန်း ငါးခုတွင် လေးခုသည် AI နည်းစနစ်များဖြင့် ဘဏ်လုပ်ငန်း စနစ်တစ်ခုလုံးကို တော်လှန်ပြုပြင် ပြောင်းလဲမည်ဆိုခြင်းအား ထောက်ခံကြောင်း ယင်းသတင်းကဆိုသည်။

နည်းပညာတိုးတက်လာသည်နှင့်အမျှ ဘဏ်လုပ်ငန်းဆိုင်ရာ ဝန်ဆောင်မှုများကို စက်ရုပ်များဖြင့် အစားထိုး အသုံးပြုခြင်းမှာ ပိုပြီး တိကျမြန်ဆန်လာဖွယ်ရှိကြောင်း၊ လာမည့် သုံးနှစ်အတွင်း လူမလိုသည့် ဘဏ် ဝန်ဆောင်မှုများကို ကြိ်ုဆိုကြောင်း လုပ်ငန်းရှင် လေးပုံ သုံးပုံခန့်ကလည်း ထောက်ခံအတည်ပြုပေးခဲ့ကြ ကြောင်း အစီရင်ခံစာတွင် ရေးသားထားသည်။

AI နည်းပညာများကို မောင်းသူမဲ့ကားများ၊ လေယာဉ်များ၊ အသံကိုမှတ်မိသည့် ဆော့ဖ်ဝဲများတွင် အသုံးပြုလာ နိုင်ခြင်းကြောင့် ခေတ်မီတိုးတက်ဆန်းသစ်မှုများကို လုပ်ဆောင်နေချိန်တွင် ဘဏ်လုပ်ငန်းတစ်ခုတည်းက နောက်ချန်ပြီး ကျန်ခဲ့ရန် မဖြစ်နိုင်ကြောင်း၊ ထို့ကြောင့် အကောင်းဆုံးနှင့် အမြန်ဆုံးဝန်ဆောင်မှုပေးရေး ဆိုသည်ကို ဘဏ်များအနေဖြင့် အပြိုင်အဆိုင် လုပ်လာရန်အတွက် စက်ရုပ်များကိုထားပေးပြီး ဖြေရှင်းရန် နည်းလမ်းကလွဲ၌ အခြားမရှိကြောင်း The Economic Times တွင်ဖော်ပြထားသည်။

လက်ရှိအသုံးပြုနေကြသည့် ဘဏ်ဝန်ဆောင်မှုများဖြစ်သော ငွေသွင်းငွေထုတ်ကိစ္စများကိုလည်း လူမပါဘဲ လုပ်ဆောင်ရမှုများကို ဖောက်သည်များက သဘောကျနှစ်သက်လျက်ရှိပြီး၊ လူသားဝန်ထမ်းကို လျှော့နိုင်သမျှ လျှော့ချပြီး စက်များကို အစားထိုးသုံးစွဲနိုင်ခြင်းမှာ ပိုပြီးစိတ်ချယုံကြည်ရသည့်အသွင်ဖြစ်လာမည်ဟု Accenture ဘဏ်လုပ်ငန်းဆိုင်ရာ အကြံပေးအဖွဲ့ အကြီးအကဲ အလန် မက်အင်တိုင်းရားကပြောကြားသည်။

Powered by Bullraider.com