Google ဘာသာပြန်စနစ်တွင် ဘာသာစကား ၂၀ ထပ်မံဖြည့်သွင်း

Category: မောက္ခနိုင်ငံတကာသတင်း
Published on Monday, 03 August 2015 01:43
Written by သတင်းအဖွဲ့

http://www.themarysue.com/wp-content/uploads/2010/08/google-translate.jpg#geekosystem

ဝါရှင်တန်၊ ဇူလိုင် ၃၀

နာမည်ကျော် အင်တာနက်ကုမ္ပဏီကြီးတစ်ခုဖြစ်သည့် Google သည် မိမိတို့ Website ကတစ်ဆင့် ဘာသာစကား တစ်ခုမှ အခြားဘာသာစကားတစ်ခုသို့ ချက်ချင်းပြောင်းလဲပေးနိုင်သော မိုဘိုင်းလ်ဘာသာပြန်စနစ်ဆော့ဖ်ဝဲတွင် ဘာသာစကား အမျိုးပေါင်း ၂၀ ကိုထပ်မံဖြည့်သွင်းလိုက်ကြောင်း Gadgets NDTV သတင်းတွင်ဖော်ပြထားသည်။

ယခုအခါ Google ၏ စမတ်ဖုန်း ဘာသာပြန်ဆော့ဖ်ဝဲအတွင်း ဘာသာစကား ၂၇ မျိုးကို ချက်ချင်းဘာသာပြန်ပေးနိုင်ပြီဖြစ် ကြောင်း ယင်းသတင်းကဆိုသည်။

မိမိတို့ အနေဖြင့် စာသားများကို တိုက်ရိုက်ဘာသာပြန်ပေးနိုင်သည့် စနစ်ကိုသာမက ပြောစကားတစ်ခုကို တိုက်ရိုက်ဘာသာ ပြန်ကာ အသံထုတ်ပေးနိုင်မည့် Translate ဆိုသည့်ဆော့ဖ်ဝဲကိုလည်း တီထွင်လျက်ရှိကြောင်း Google တာဝန်ရှိသူများ ကပြောကြားသည်။

Google ၏ စာစကားပြန်စနစ်ကို အင်္ဂလိပ်၊ ပြင်သစ်၊ ဂျာမန်၊ အီတလီ၊ ပေါ်တူဂီ၊ ရုရှား၊ စပိန် ဘာသာစကား ခုနှစ်မျိုးဖြင့် စတင်ခဲ့ပြီး နောက်တိုးသည့်ဘာသာစကားများတွင် ဥရောပနိုင်ငံများနှင့် အာရှမှ အင်ဒိုနီးရှား ဘာသာစကားပါရှိသော်လည်း မြန်မာဘာသာစကား ပါဝင်ခြင်း မရှိသေးပေ။

အင်္ဂလိပ်စာမှ ဟင်ဒီသို့လည်းကောင်း၊ အင်္ဂလိပ်စာမှ ထိုင်းဘာသာစကားသို့လည်းကောင်း လမ်းကြောင်းတစ်ကြောင်းတည်း ဘာသာပြန်စနစ်ကိုသုံးနိုင်ပြီး၊ ထိုင်းနှင့် ဟင်ဒီမှ အင်္ဂလိပ်ဘာသာစကားသို့ ပြန်ဆိုခိုင်းခြင်း မပြုနိုင်သေးဟု Google က ထုတ်ပြန်ထားသည်။

ကမ္ဘာပေါ်ရှိ လူဦးရေ ၂၀ ရာခိုင်နှုန်းသည် အင်္ဂလိပ်စကားပြောကြပြီး၊ အင်တာနက်တွင်တင်သည့် အကြောင်းအရာ အားလုံး၏ ထက်ဝက်ကျော်မှာလည်း အင်္ဂလိပ်ဘာသာနှင့်ဖြစ်သောကြောင့် အင်္ဂလိပ်စကားကိုပင် အခြေခံကာ လုပ်ဆောင်ရဦးမည်ဟု Google အဖွဲ့မှ တာဝန်ရှိသူများကပြောကြားသည်။

Powered by Bullraider.com