အခြေခံကျန်းမာရေးတက္ကသိုလ် သက်တမ်း(၂၂)နှစ်တွင် ကျန်းမာရေး သိပ္ပံဘွဲ့ရမောင်မယ် ၁၉၇၄ ဦး လေ့ကျင့်မွေးထုတ်

Image may contain: 1 person, standing, hat and outdoor

မကွေး ဖေဖော်ဝါရီ ၄

အခြေခံကျန်းမာရေး တက္ကသိုလ် (မကွေး)(၁၄)ကြိမ်မြောက် ဘွဲ့နှင်း သဘင်အခမ်းအနားကို ယနေ့နံနက် ၉ နာရီက အခြေခံကျန်းမာရေး တက္ကသိုလ်(မကွေး) မြဧရာခန်းမ၌ ကျင်းပသည်။

မြန်မာနိုင်ငံနှင့် ဒေသအတွင်း ဦးဆောင်သော အခြေခံကျန်းမာရေး တက္ကသိုလ်တစ်ခုအဖြစ် ရပ်တည်ရန် ရည်မှန်းချက်(Vision)နှင့် အရည်အချင်းပြည့်ဝသော အခြေခံကျန်းမာ ရေးပညာရှင်များ မွေးထုတ်ရန်၊ ပြည်သူလူထု၏ ကျန်းမာရေး စောင့်ရှောက်မှုကို နှီးနွှယ်ဌာနများ နှင့်ပူးပေါင်း၍ အပြည့်အဝပေးရန် နှင့်အရည်အသွေးရှိသော ပြည်သူအကျိုးပြု သုတေသနလုပ်ငန်းများ ဆောင်ရွက်ရန်ဟူသော လုပ်ငန်းတာဝန် (Mission)သုံးခုနှင့် အကောင် အထည်ဖော်ဆောင်ရွက်နေပါကြောင်း၊ အခြေခံကျန်းမာရေး တက္ကသိုလ်အဖြစ် အဆင့်မြှင့်တင်သည့် ၁၉၉၅ ခုနှစ်မှ ယနေ့အထိ ကျန်းမာရေး သိပ္ပံဘွဲ့ရမောင်မယ် ၁၉၇၄ ဦးအပြင် အခြားလက်မှတ်ရ သင်တန်းသားများ ဖြစ်သည့် လက်ထောက်ကျန်းမာရေး မှူး ၁၂၉၈ ဦး၊ ပြည်သူ့ကျန်းမာရေး ကြီးကြပ်(၁) ၁၄၂၁ ဦးနှင့် ပြည်သူ့ ကျန်းမာရေး ကြီးကြပ်(၂) ၃၃၃၂ ဦး၊ စုစုပေါင်း ၆ဝ၅၁ ဦးတို့ကို လေ့ကျင့် မွေးထုတ်ပေးခဲ့ပြီးဖြစ်ကြောင်း၊ ထို့အပြင် ဆေးတက္ကသိုလ်(မကွေး)မှ အလုပ် သင်ဆရာဝန် စုစုပေါင်း ၄၁၇၆ ဦး ကိုလည်း လူထုကျန်းမာရေး ပညာရပ်အတွက် ကွင်းဆင်းလေ့ကျင့်သင်ကြား ပေးခဲ့ပြီးဖြစ်ကြောင်း ယနေ့ကျင်းပ သည့် (၁၄)ကြိမ်မြောက်အခြေခံ ကျန်းမာရေး တက္ကသိုလ်(မကွေး) ဘွဲ့နှင်းသဘင်အခမ်းအနားတွင် ပါမောက္ခချုပ် ပါမောက္ခဒေါက်တာ ထင်ဇော်စိုးက ထည့်သွင်းပြောကြားသည်။

အခြေခံကျန်းမာရေး တက္ကသိုလ် (မကွေး) (၁၄)ကြိမ်မြောက် ဘွဲ့နှင်းသဘင်အခမ်းအနားကို ဘွဲ့အပ်နှင်းပွဲ အစီအစဉ်များအတိုင်း ဆောင်ရွက်ခဲ့ကြောင်းနှင့် ယနေ့အခမ်းအနားတွင် ကျန်းမာရေးသိပ္ပံဘွဲ့ (အခြေခံကျန်းမာရေး)ဘွဲ့ရ မောင်မယ် ၁ဝ၉ ဦးအား ဘွဲ့လက်မှတ်များ အပ်နှင်းခဲ့ကြောင်း သိရသည်။

သန်းနိုင်ဦး(ငဖဲ)

ကြေးမုံသတင်းစာ (၆.၂.၂၀၁၇)

Powered by Bullraider.com